ABOUT US · 關於我哋
精神健康支援，應該更容易開始。
有時，我哋知道自己最近唔太好。
可能係工作愈來愈消耗、關係入面反覆內耗、瞓唔好、提唔起勁；又或者只係有啲嘢收埋咗好耐，但唔知道可以同邊個講。
但由「我好似需要幫助」，去到真正獲得適合嘅支援，中間往往有好多阻力。
唔知道自己係咪「嚴重到需要輔導」、
唔知道應該搵邊類專業人士、
唔知道第一次可以講啲咩，
甚至連自己發生緊咩事，都未必整理得清楚。
香港生活節奏快，工作、學業、家庭、關係同生活成本可以同時壓落嚟。但求助往往仍然被想像成一件要去到「好嚴重」先需要做嘅事。
「傾一傾」希望令尋求心理支援呢一步，更容易、更安心，亦更可信。
點樣開始
由精神健康專業人士及服務使用者共同參與建立
精神健康服務唔應該單靠一個專業或科技公司去想像人需要啲咩。「傾一傾」嘅發展結合不同角度，包括：
我哋希望將幾樣同樣重要嘅嘢放埋一齊：
因為一個可信嘅精神健康服務，唔應該只係「方便」，亦需要專業、安全、有界線，並且真正理解使用者。
我哋嘅底線
專業，係我哋最重要嘅底線之一
心理支援唔只係「搵個人傾偈」。當中可以涉及情緒困擾、風險識別、保密、專業界線、倫理判斷，以及有需要時作出適當轉介。
當一個人將自己最脆弱、最難講出口嘅部分交俾另一個人，提供支援嘅人應該具備相應嘅專業訓練、能力同問責。
因此，我哋會對平台專業人士嘅背景及資格作出審核，包括：
陪你傾嘅每一位都係真人、真資歷，開始之前可以睇得清清楚楚。
相關心理學、輔導或精神健康專業訓練
認可學歷及專業資格
適用嘅專業註冊或認證
香港心理學會（HKPS）、香港專業輔導協會（HKPCA）等相關專業體系下嘅資格或認可
相關服務及實務經驗
持續專業督導
專業倫理、保密及風險處理能力
不同專業角色會按照其訓練背景及服務範圍，採用相應嘅審核標準。
專業唔係一個 marketing label，而係服務本身嘅基本要求。
制度同保障
安全，同樣唔可以靠運氣
一個可信嘅心理健康平台，除咗要有合資格嘅專業人士，亦需要有清晰制度支持服務。我哋持續建立及完善：
服務及專業守則
使用者風險識別及處理流程
專業督導機制
保密及私隱保障
有需要時嘅轉介安排
使用者意見及投訴機制
服務質素持續檢視
「傾一傾」並非緊急或危機支援服務。如出現即時安全風險，我哋會鼓勵使用者優先尋求適當嘅緊急醫療或危機支援。
因為降低求助門檻，唔代表降低專業標準。
認可同支持
香港科學園及大學創科中心支持
「傾一傾」獲香港科學園及香港大學創科中心（Techno-Entrepreneurship Core）支持發展，喺專業同創科兩邊都有人同我哋一齊行。
由更早一步開始
我哋唔只係幫你搵一位治療師
傳統嘅心理健康平台好多時由「揀一個專業人士」開始。但對好多第一次求助嘅人嚟講，真正困難嘅一步其實發生得更早：
「我究竟發生緊咩事？」
「我係咪需要幫助？」
「我應該由邊度開始？」
所以我哋希望建立嘅唔只係預約功能。
我哋希望幫助使用者：
- 更容易了解自己目前嘅狀況
- 整理難以講清楚嘅想法、情緒同經歷
- 了解不同心理支援方式
- 搵到適合自己需要嘅專業人士
- 透過文字、電話或視像等不同方式開始
- 喺專業支援以外，持續建立對自己心理狀態嘅理解
科技唔應該取代人與人之間嘅支持。
我哋希望科技做嘅，係降低阻力、整理資訊、改善連結，令真正重要嘅對話更容易發生。
WHAT WE BELIEVE
我哋相信
心理支援唔應該只喺危機之後先開始。
一個人唔需要先證明自己「夠嚴重」，先值得得到理解同支援。
專業支援應該容易理解。
使用者有權知道自己接受緊咩服務、由咩背景嘅專業人士提供，以及有咩其他選擇。
科技應該支援專業，而唔係取代專業。
工具可以幫人整理自己、降低求助門檻，但重要嘅專業判斷同人與人之間嘅連結，仍然需要由人去承擔。
精神健康可以係日常生活嘅一部分。
我哋希望有一日，「最近有啲唔舒服，想搵人傾下」可以好似照顧身體一樣自然。唔需要羞恥，唔需要收埋，亦唔需要等到爆煲。
我哋點樣建立服務
精神健康服務並無完美靈藥。我哋會持續將研究證據 × 專業意見 × 使用者經驗 × 真實服務數據放入產品及服務設計當中。
透過專業人士意見、服務使用者 feedback、實際使用情況，以及相關心理健康研究，不斷檢視邊啲地方做得好、邊啲地方需要改善。我哋希望建立嘅唔只係一個有專業人士列表嘅平台，而係一個會持續學習、持續改善嘅心理健康服務系統。
OUR VISION
我哋想建立嘅，
唔只係一個平台
我哋希望建立一個更容易理解自己、更容易求助、更容易連接專業支援，亦更加願意談論精神健康同感受嘅社群同生態。
- 由一篇令人覺得「原來有人明」嘅內容開始
- 到第一次停低整理自己嘅狀況
- 到參與一個可以安心交流、學習同連結嘅 community
- 到第一次同專業人士講出一直收埋嘅事
- 再到持續得到適合自己嘅支援
但我哋希望改變嘅，唔只係服務流程。我哋希望慢慢改變大家同心理健康之間嘅關係。
令講情緒可以正常一點。
令求助可以早一點。
令專業心理支援可以容易理解一點。
令照顧心理健康，成為生活其中一部分。
長遠，我哋希望同心理健康專業人士、學界、社福界、社區組織、企業，以及服務使用者一齊，建立一個更加開放、專業、可信同有連結嘅香港心理健康生態。
有啲嘢，唔需要等到撐唔住先講。